近期日本手機Game《旅行青蛙》勁hit,個個都拎住部電話話要等個囝返屋企,唔係就問個囝幾時出街,未玩過隻game嘅大家可能一頭霧水,尤其係平時玩開《絕地求生》(PUBG)食雞,又或者Monster Hunter屠龍嘅巴打,唔知仲以為女朋友成日拎住部電話,好似「我的港女老婆」咁偷食。

▲selina就自稱係《旅行青蛙》入面嘅媽媽。

▲近期個個人都拎住部電話玩《旅行青蛙》。(網上圖片)

其實《旅行青蛙》就唔係咩咁厲害嘅game,就類似Tamagotchi咁嘅育成遊戲,即係養青蛙,聽落好似無無聊聊咁,有咩咁好玩啊?佢巧妙之處,就係隻青蛙仔唔會受你控制,你雖然可以幫佢改名,但你唔可以指示佢去做嘢,所以最吊大家癮就係你唔知佢幾時躝街去旅行,又唔知佢幾時先去完旅行返屋企,呢種捉摸唔到嘅感覺就最令大家「囉囉攣」,只可以時不時拎部電話禁入Game睇吓阿囝喺唔喺屋企,完全好似未拍拖嗰陣同對方估估吓嘅感覺。

▲喺《旅行青蛙》入面你永遠唔知佢去咗邊,寄咩明信片返嚟。(網上圖片)

女仔就最鍾意呢種錯摸心理嘅feel,即係好似觀音兵點解做極都係兵,而MK仔就咁易食到女神,除咗係因為「你的樣子如何,你的日子也必如何」之外,最重要就係通常兵都係隨傳隨到,叫你做乜就做乜,都冇咩挑戰性,畀人感覺奴性好重,唔使你做嘢仲搵邊個。而MK仔行事我行我素,永遠都估佢唔到,就係咁有個性先吸引到女神注意,就好似青蛙仔咁,你想佢返屋企佢又唔係到,你唔想佢成日留喺屋企,佢又仲坐喺度食早餐,咁有自己Style就正中各位姊妹下懷喇,抵《旅行青蛙》咁成功嘅!

来源: hk01


Like Rojaklah Facebook!不出门也能知天下事~

Like Rojaklah TV Facebook!随时观看Video,给你Happy给你FUN❤

Comments

comments