已故一代巨星鄧麗君，95年逝世後，長眠台灣金寶山「筠園」，每年都有上萬粉絲前往悼念，不過近日鄧麗君喺香港嘅「君迷會」，就投訴指某位歌迷長期喺墓碑上，以雙面膠貼上鄧麗君嘅照片，導致碑石受到破壞，斥責呢位歌迷屢勸不改嘅行為離譜，而且對偶像亦極不尊重。

對此，身處國外嘅鄧麗君三哥鄧長富回應台灣傳媒話：「絕不允許破壞，近日會請基金會人員了解狀況處理。」

據「君迷會」秘書周小姐透露，自99年開始就有歌迷喺碑石上貼照片，但當時捉唔到破壞嘅人，呢件事持續多年但依然未改善，碑石好早已經失去原來嘅面貌。

其實今年8月，「君迷會」成員去台灣悼念，發現墓碑上雙面膠痕已被清理乾淨重新打磨，恢復咗原有樣貌，但結果喺9月，發現碑石又被貼上照片，有歌迷睇唔過眼撕甩照片，期後一王姓歌迷喺facebook留言不滿貼相俾人撕掉，貼照元凶終於現形。

事後網民批評呢位歌迷超冇公德心，「別當自家東西好嗎」、「屢勸不聽真的是有病」。

Like Rojaklah Facebook！不出门也能知天下事～～❤

来源：苹果日报