韓國人氣綜藝節目《Running Man》(RM)前成員Gary噚日抵港，出席今日喺銅鑼灣皇室堡舉行嘅簽名會見港迷，今次係佢宣佈退出《RM》後首次公開於香港亮相，吸引超過500粉絲到場見oppa。

雖然活動於晏晝3點先正式開始，但有好多粉絲已經早早到場等候，更準備好橫額為偶像應援。

Gary準時3點身穿乾濕褸現身，立即引起粉絲尖叫，而Gary亦好識做地向粉絲揮手，並用廣東話打招呼：「大家好，我係Gary，我好掛住你哋。」之後又話因為現場嘅粉絲所以裝飾得呢度更加靚，認真識冧粉絲！被問到嚟緊聖誕節會點過，Gary就自爆想去旅行，但似乎都係工作中度過，不過被問到建議送乜聖誕禮拜畀人？Gary就話：「如果係情侶當然係送錫錫，K.I.S.S。」認真搞鬼。被問到來年有咩計劃，Gary就表會專注於音樂，亦計劃於明年初再訪港開騷，叫粉絲期待吓。及後就進行聖誕裝飾嘅揭幕禮，嘉賓仲有GUDETAMA（蛋黃哥），Gary就化身暖男，不停問蛋黃哥「使唔使幫手？」、「有冇事？」相當貼心，Gary同蛋黃哥影相時又擺出冧樣。之後Gary就即場抽4個幸運粉絲玩2個遊戲，更大方抱抱粉絲，當中一名粉絲贏咗遊戲，獲得Gary餵食cupcake，不過Gary就叫粉絲擘大口並將蛋糕塞入粉絲口中，完成唔顧對方係女仔，場面爆笑，不過嗰名粉絲更趁機錫咗Gary一啖，令其他粉絲嘅尖叫不已。

Gary喺現場亦有提到《RM》：「好多謝節目組同成員嘅理解，為咗實現自己嘅夢想而退出，佢哋都有為我打氣。」Gary又話知道HaHa都嚟咗香港，本來約咗HaHa食飯，但因為自己夜晚先抵港就約唔成。

Gary更直認如果將來有機會都想以嘉賓身份上《RM》，令粉絲都相當期待。據知Gary正努力學國語中，被問到學到咩程度，Gary就話識點菜，即場講咗句「可以給我一杯咖啡嗎？」發音相當標準，Gary更好學地學埋該句嘅廣東話，發音都唔錯。被問到理想型係咩人時，全場粉絲都大叫「智孝」，Gary就笑笑咁話細個好鍾意王祖賢。最後Gary離開前有用國語向粉絲講「再見」，粉絲亦十分不捨。