啱啱30歲嘅大台小花樂瞳，撇甩高大金融才俊男友阿希(但係今年3月仲一齊去日本旅行喎)，另結來自大陸嘅有米富二代David，出入都會揸價值百萬嘅瑪莎拉蒂㖭！

樂瞳去年先同34歲嘅金融形男阿希撻着，兩個仲好鬼sweet咁經常外遊預支蜜月，之前去完泰國再去日本，但係唔知咩事，樂瞳返嚟香港無耐，就話同阿希分手，然後一星期唔夠，就話有新男友(呢個故事係咪好面善呢？)

呢位新歡，冇錯就係出入揸價值百萬嘅瑪莎拉蒂嘅David。男方屋企人喺九龍站The Austin有兩個相連單位，而樂瞳結新歡無耐，就已經喺九龍站租咗個apartment一齊住，之後仲發展到男方俾咗間千萬豪宅樂瞳住添。

拍拖短短個幾月，樂瞳就陪David周遊列國；而每次出trip，樂瞳都食好住好，乘坐商務客位，兼且佢仲會不時係網上晒命。

係啦係啦，今日有周刊報道指，樂瞳就係因為太晒出事，俾強國富二代飛起，打回原形，係囉係囉，衰高調囉。傳說中嘅千萬豪宅馬上被沒收，搬返東涌居屋同家人住。之前出入有瑪莎拉蒂、又有七人車送佢北上會男友，家陣都係坐返巴士同劇組車方便啲。

報道仲話，熱戀期放聲氣暗示退出唔撈嘅樂瞳，家陣轉晒口風，話希望繼續留喺公司試唔同嘢。咦，唔通真係……

不過睇樂瞳ig，又唔覺失戀喎，前日先晒完收百支玫瑰，又貼燭光晚餐相，究竟呢個另一半，係咪仲係David先？

Like Rojaklah Facebook！不出门也能知天下事～～❤

来源：苹果日报