樂瞳今次真係為演出犧牲，佢在《為食神探》中飾演的鹹魚妹潘小蓮，唔化妝之餘塊面又黑又有汗斑，完全唔識打扮，係個不折不扣的村姑。而且佢成身仲勁大陣鹹魚腥臭味，真係行去到邊都會被人嫌棄嗰種！

小蓮雖然很醜，但佢很溫柔，遇上又叻又有錢又靚仔的才俊Duncan(楊明飾)，對方仲完全唔介意佢身份外貌，真心真意向佢求婚！白馬王子愛醜女的童話故事竟然在現實出現，小蓮自己都難以置信，所以就搵私家偵探社查佢！

昨晚劇情講到Duncan為小蓮悉心準備了燭光晚餐，令佢又驚又喜，但卻無意中聽到對方一通電話，懷疑對方有事隱瞞自己，所以即時用手機錄音！

錄音之後，小蓮即時打電話到娜姐(江欣燕飾) 的偵探社，表示手上有Duncan的電話錄音，希望可以重新調查對方。但佢呢番說話已經被Duncan聽到，於是處心積慮想對付小蓮！

小蓮向來有食物敏感，唔可以食有蕎麥成份的食物，但小蓮食完Duncan準備的食物後就因食物過敏引發哮喘，送院後不治！唔使多講，在菜式中落手腳的當然就係Duncan！呢個可憐角色就此慘死，實在令人不捨！

身形嬌小的樂瞳入行以來都係保持可愛形象，每次拍劇都係做回自己，演一啲可愛、靚女或是學生妹的角色。但今次佢願意放下可愛一面，飾演咁醜樣的鹹魚味，雖然出鏡唔多好快就死咗，但都成功令觀眾留意到佢！依家睇番樂瞳平時個靚樣，真係有啲唔慣！

樂瞳雖然細細粒，不過身材就好有睇頭，不時都會見到佢在網上大騷身材派福利，睇到一眾男粉絲狂噴鼻血！童顏加上嬌嗲聲線，真係睇唔出佢原來已經30歲！