觀眾激讚的無綫話題劇《城寨英雄》，昨晚終於播出大結局，大結局收視最高達35.2點，最高收看人數逾228萬，為全年劇集收視之冠！歐瑞偉飾演、有鐵布衫護體的終極Boss天干終於被殺，大快人心！天干呢個角色咁突出，歐瑞偉的精湛演出居功至偉，佢在劇中除咗唔用替身、親身上陣不停捱打，更因為幾場戲要拍到胳肋底，為求美觀所以剃光腋毛！

歐瑞偉早前出席活動時，表示《城寨英雄》一眾角色塑造得相當成功，而且有大量漫畫式打鬥，所以叫大家唔好當現實咁睇。雖然佢在劇中擁有鐵布衫護體，刀槍不入，但其實完全冇著數！正因為佢刀槍不入，所以在劇中不斷被猛烈拳打腳踢，歐瑞偉話一啲都唔享受！

《城寨》監製文偉鴻早前在IG透露，歐瑞偉為咗呈現最好的效果，在多場打鬥戲都親身上陣，拒用替身！其中呢幕歐瑞偉被伍允龍起飛腳踢頭，亦都冇花冇假，堅係踢落去！

仲有呢一幕慢鏡飛腳踢心口，全部都係歐瑞偉親身演繹！難怪監製都話佢除咗打得好睇，連捱打戲份都非常真實！厲害！

歐瑞偉為劇集所作的犧牲，又豈止係係捱打？佢在劇中大部分時間都係著恤衫，不過結局篇就不停爆衫犧牲色相！雖然歐瑞偉已經五十有四，不過佢從前做過龍虎武師，現時亦係武術指導，身形keep得好好！

捱打又半裸，最慘係連胳肋底都要演出！因為劇情提到天干將罩門(即死穴)轉移到章門穴，即係右邊胳肋底，於是胳肋底就不斷被狂攻！

由於胳肋底不停有大特寫，歐瑞偉為咗令拍攝效果更美觀，竟然連腋毛都全部剃清光！由唔同角度都見到佢胳肋底非常光滑，「KC」果然係敬業樂業！

全文完

来源：thegreatdaily