藝人王賢誌近日與相戀7年嘅圈外男友喺溫哥華拉埋天窗，真係恭喜哂～小編祝你哋白頭到老，永遠幸福快樂。其實作為LGBT（Lesbian、Gay、Bisexual和Transgender）要公開承認自己性取向已經唔容易，因為會受到唔少人歧視同咒罵，更何況係藝人呢？不過娛樂圈中都有唔少藝人非常勇敢，喺傳媒面對大方承認性取向。

不如睇下以下4位公開自己LGBT身份嘅藝人：

王賢誌（香港）

出道以嚟性取向一直成疑嘅富二代王賢誌，喺2013年打破沉默，接受香港電台同志節目《自己人》訪問時承認同志身份，自爆38歲先初戀，當時男友現任老公Kelvin就係佢初戀情人。佢接受訪問時已經話好想同佢喺香港搞婚禮，不過香港同性婚姻仲未合法，所以近日王賢誌就同Kelvin遠赴同性婚姻合法嘅加拿大結婚註冊喇。

林一峰（香港）

於2008年，歌手林一峰接受外國同志雜誌《Advocate》訪問，以「香港沒有Elton John，卻有林一峰」作引言，大方公開性取向，並直指其實早喺5年前已經喺香港承認過自己係同性戀。對於驚唔驚畀人歧視，佢曾經接受訪問指：「我做人好光明磊落，事無不可對人言，歌手仍然好鍾意我嘅文字，完全無影響我工作，出街亦無畀人鬧過。所以，我都建議一啲結咗婚但唔認嘅藝人學吓我，放低包袱呀。」林一峰亦經常公開同男友拖手行街拍拖，仲畀妹妹林二汶笑佢啲Ex（前度男友）多到可以坐滿亞博。

梁祖堯（香港）

舞台劇演員梁祖堯入行以嚟飾演過唔少同性戀者角色，而一套同志劇《攣到爆》，更令佢奪得2004至2005年度香港舞台劇獎最佳男主角（喜／鬧劇），打開知名度。戲外嘅佢同樣係一名同志，曾經喺訪問中坦認性取向，話20幾歲時發現自己鍾意男性，話媽咪知道當時都有傷心而覺得內疚，有後悔過公開承認同志身份。不過最終都慶幸自己有講到出嚟，因為代表能夠接受自己。

歐陽靖（台灣）

台灣著名藝人譚艾珍女兒、藝人兼作家歐陽靖，喺自己本書同接受傳媒訪問時，大方承認自己係雙性戀，並表示「打從有意識開始，我就不設限交往對象的性別、年齡、身分……」，亦曾經交過9位男朋友同5位女朋友。坦蕩蕩嘅態度令佢得到唔少支持，連媽媽都肯接受佢雙性戀嘅性取向。

来源：yahoo style