「世紀情侶」方力申和鄧麗欣，80後見證着他們相識、拍拖、嘈交、鬧分手和復合，可惜最後逃唔過分手，拍拖十周年，唔結就分，令人唏噓。Stephy在網上再發聲明，表示佢同小方分歧愈來愈大，因了解而分開，仲讚小方係佢識過咁多男仔中最好，否認有第三者的說法。不過，最後Stephy又表明「我們世界裏從來不存在童話」，暗示要面對分手嘅殘酷現實，相信佢都承受咗好大壓力及傷痛！

去年聖誕，適逢是他倆的代表作《獨家試愛》十周年，二人合作新片《紀念日》，聯同《獨家試愛》、《十分愛》同《我的最愛》的「愛情三部曲」，四部電影中有不少殘酷分手密語，以下「十二句分手密語」，邊睇小編都切身感受到二人分手之痛…

《紀念日》篇

分手物語一：「你成日話有PLAN，但你PLAN入面永遠都冇我！」

麵包雖然緊要，但忙到冇時間陪我，咁不如分手啦！

分手物語二：「我呃你係因為我愛你，唔係我哋點捱十年？你估你真係好易頂呀？」

咁難頂就唔好頂！

分手物語三：「你係咪好想離婚？」

終極一句！

《獨家試愛》篇

分手物語四：「我問你，係咪想離婚？」

十年前已有嘅一幕，無論離婚定分手，都係最終必殺技！

分手物語五：「一次不忠，百次不容！你叫我點信你將來唔會再鍾意另一個女人？」

發現對方劈腿偷食，就用呢句大對方，然後就講分手啦！

《獨家試愛》篇

分手物語六：「愛情係有期限。」

愛情似罐頭，太耐會變味甚至轉淡！

《十分愛》篇

分手物語七：「當佢真係鍾意我嘅時候，我覺得場遊戲已經唔好玩！」

既然唔好玩，就let it go！

分手物語八：「啲臭男人就淨係知道我條底褲擺邊，就永遠唔知我條底線擺邊！」

擺明有性冇愛啦，點解仲要喺埋一齊！？

《我的最愛》篇

分手物語九：「有冇人同你講過，愛一個人要講TIMING，我同你喺唔啱TIMING喺埋一齊，唔WORK！」

講到好有道理咁！

分手物語十：「你值得有一個更加愛你嘅人，你將來一定搵到個，你又好愛佢，佢又好愛你嘅人！但我冇咁好彩，我唔係呢個人！」

向對方提出分手，都要安慰吓佢嘛！

分手物語十一：「真正愛一個人，應該俾佢自由，唔係完全咁佔有佢！」

對方死都唔肯分手，試吓講呢句睇吓甩唔甩到身囉！

分手物語十二：「喜歡就KEEP，不喜歡就DELETE！」

講到咁，擺明玩完即棄啦！

来源：东方新地