拍拖超過一年的馬國明與黃心穎,早前有指女方打入富二代圈子一心釣金龜,同時繼續對馬明曖昧若即若離,更因為二人多次在公開場合避忌唔合體、又話好耐冇見而傳分訊。不過近月關係突然變親密,去完荷蘭歐遊返港,馬明約心穎歎法國菜慶生,又出席黃家為心穎搞的生日飯,感情進步神速。

44歲的馬明慳足半世一朝喪,歐遊已經放咗唔少血,日前本刊記者更直擊他去銅鑼灣showroom睇Benz,莫非想送架車畀心穎做生日同情人節禮物?近得物質主義的心穎多,馬明亦開始改變消費模式,眼見樸實乖仔為女變質,難怪心穎到現在都未能融入馬家。


馬國明與黃心穎拍拖至今已是公開秘密,但他們從未堂堂正正拖實見人,去年尾直腸直肚的馬明話:「除非結婚或分手,否則唔需要交代。」之後二人出席公開活動貌合神離,心穎又被指暗撻富貴新歡,分手之說甚囂塵上,負面新聞隨之而來。未幾心穎即發功,在台慶頒獎禮前,高調為爭視帝的馬明落力拉票,當晚又一反常態,高調合體搶鏡,當馬明失落視帝,她即時呵番於社交網以一句「I proud of you!」力撐。

上月21日在台慶頒獎禮上,心穎突然變得主動又熱情,全晚黐實馬明,更高調地把合照放上網。

心穎上月29歲生日,在 IG上載一張寫有「 Happy Birthday Sum Wing BB」的單人照,笑容燦爛。

之後藝人黃長興玩「踢爆」,晒出三人自拍照,相中見馬國明與黃心穎正在歎法國菜慶生,兩人並肩而坐,臉上同樣流露甜蜜表情,罕有地高調放閃。

另一晚心穎與家人提前到尖沙咀1881慶生,當晚心穎離開時遇記者,全家大方影合照,其時她表示男友不在場,但同時馬明卻被目擊由後門速逃,心穎即被踢爆講大話。其後有馬明在內的全家福流出,心穎坦言生氣:「係家姐唔小心放上微信,有啲唔開心,因為總有人會覺得係我放出嚟,我都有同馬國明交代。」


馬國明 慳佬學揈錢
心穎所做的一切,似乎是想宣示主權,公告天下與馬明未甩拖。女友一心歸邊,馬明當然受落,早於一月齊齊放假飛去荷蘭旅行,平時慳慳埋埋的馬明甘心為女友大放血,據知情者透露:「馬明出名係慳佬,賺錢都畀晒阿媽管,佢唔捨得用錢,不過為咗心穎變咗唔少,女友鍾意打扮買潮嘢,馬明唔多唔少都要跟吓,早前去荷蘭玩,大部分使費都係佢畀,唔通旅行拍拖要女仔夾錢咩?去到歐洲又買吓名牌,真係放血㗎!返到香港又到心穎生日,馬明今次真係好闊佬,除咗去黃長興間餐廳食法國菜,仲同心穎成家去尖沙咀食飯,大大個準女婿喺度,佢亦識做埋單。總之近排馬明使咗唔少錢啦!馬明媽咪覺得心穎貪玩識食,搞到馬明變大花筒,所以印象真係麻麻,馬明啲家姐都覺得心穎影響好大對佢落晒閘,馬明到依家都唔敢帶佢返屋企。」

難怪曾對外表示婚後一定會與家人同住的馬明,近日亦改口風要努力賺錢再買樓結婚,又話驚相見好同住難,婆媳糾紛難避免,更何況心穎未被家人接受,馬明要與心穎繼續走下去,看來遲早要與家人分居。

上月初,心穎在IG不停放外遊單人照,張張相都甜到漏。

其後馬明承認早前二人曾到歐洲荷蘭旅行,去了8日,一齊了解下荷蘭。

馬明操刀揸相機唔錯,但說到公開情侶關係,他們異口同聲說:「無需要這樣公開,有重大決定時才會公布。」

天然呆變型男
為迎合心穎改變形象是馬明的第一步,上周四(1月25日)下午四時許,馬明獨自駕車到銅鑼灣,在利園商場泊好車後,他走到禮頓道的Benz showroom,向來衣著打扮甚求其的他,這日明顯有造型,黑色襯衫加黑外套,髮型也不是亂七八糟,不少途人都對這位一線小生眼望望。本刊記者直擊馬明直入車行的VIP房,疑似為買新車辦手續,逗留超過半小時後,他手持一個Benz信封離開,只見車行sales對這位大客仔招呼周到,送到出大門口。這時馬明見到本刊記者非常友善笑晒口,問他是否買車送心穎,他連番否認說是來為自己架Benz搞維修,但奇就奇在他的座駕停泊在幾條街之外。

這日一身黑衣打扮的馬明型就型喇!不過難改天然呆,在利園泊好車行去幾條街之隔的禮頓道,馬明等過馬路繼續頭昂昂發呆。

到達Benz showroom,馬明直入VIP房,其後由sales殷勤護送離開,睇嚟又有幫襯。

出門口遇見本刊記者,馬明友善笑笑口,被問及是否送車畀心穎,他笑言來做servicing。
岳父喜見女婿
心穎甜美過人又識得箍住男人心,做咗寡佬多年嘅馬明為她心甘命抵改變自己,對於外界指女友貪慕虛榮的指控,他都唔當係一回事。上月心穎29歲生日,與家人在尖沙咀1881慶祝生日,其父母和三位家姐及二姐夫都在場。生日飯局結束後,心穎一家人由餐廳正門離開,並主動讓傳媒拍全家福,有指當時心穎向記者說馬明不在場,但記者卻目睹馬明同時間趁機由後門閃走。心穎聲東擊西被指講大話,馬明出言維護是自 己不想惹人誤會攞心穎家人來作宣傳,挺身為女友多番解畫,一力承擔責任。

馬明處處維護令心穎冧爆,二人由保持距離變愈行愈埋,雖然馬家落閘但黃家大門卻為馬明而開,說到在生日當晚見家長一事,心穎直言只是她的生日飯而非安排見家長,不過 人對馬明印象非常好。事實上馬明早已與黃家上下打成一片,早前有人目睹他陪心穎及其二家姐一家去荔枝角的商場玩雪,其時馬明與二家姐的仔女玩得好開心,睇得出他非常鍾意小朋友,而他與心穎父親亦多次見面食飯,未來岳父非常滿意馬明,覺得可以把女兒付託終身。由此可見,心穎早已食硬馬明,現在只有馬明屋企人一關未過。其實心穎係醒目世界女,連守財多年的馬明都畀佢氹到,應該冇嘢難到佢。

早前在頒獎禮記者會,心穎突然與馬明保持距離,其時又傳出心穎暗撻富二代,即傳二人分訊。

出名孝順又顧家的馬明,多年來與家人同住,去年更遷入他以1,960萬元購入的太古城頂層連天台單位,閒時見他陪母飲茶行街。如今因為心穎未被家人接受,馬明左右做人難。

多年來馬明都唔好名牌,早前做善事,馬明出錢出力,著住小背心搬貨,不過今時唔同往日,為了襯心穎,馬明花了不少錢置裝扮潮扮young,難怪家人有怨言。


忽冷忽熱
早前在頒獎禮記者會,心穎突然與馬明保持距離,其時又傳出心穎暗撻富二代,即傳二人分訊。但在1月21日的台慶頒獎上,馬明雖然失落視帝,但仍憑《降魔的》內的馬季一角獲得「最受歡迎男角色」,心穎當晚頻頻發功,除企起身冧爆主動與馬明握手外,致謝辭時眾人又指住她,示意叫馬明多謝她,心穎攞晒彩。

馬明在台慶頒獎上獲得「最受歡迎男角色」獎。

馬明得獎一刻,心穎主動企起身與馬明握手。

當馬明致謝辭時,眾女星都手指心穎,示意叫馬明多謝她。
馬明呻窮:邊度仲有錢?
記:本刊記者 馬:馬國明

記:馬明買車呀?係咪送畀心穎做生日禮物呀?

馬:邊度仲有錢呀大佬?我架車本身都係呢個品牌,我嚟做servicing啫!

記:之前帶心穎去黃長興間法國餐廳慶祝生日?

馬:係呀!長興問合照po唔po得?我哋都冇所謂,我哋都唔當係咩一回事。

記:第二晚同佢屋企人慶祝,心穎講大話喎?

馬:佢冇講大話呀!

記:心穎話同屋企人食飯冇你份,事實你在場喎!

馬:因為頒獎禮前,唔想攞人哋屋企人做宣傳,過咗就是但啦!冇所謂啦!

去年以84萬買入Benz新車的馬明,向記者呻窮,莫非去完歐遊放血大傷元氣 ?

1月29日心穎為新劇《丫鬟大聯盟》試造型,終於當女一的她首次與洪永城合作,談到日前收到fans送的花和戒指,她表示從未收過馬明送花與戒指,但當被問及馬明去睇車,她即笑不攏嘴:「應該唔會送畀我囉!」

黃心穎:呢排了解多咗!
記:本刊記者 黃:黃心穎

記:馬明去車行睇車,會唔會買車送畀你?

黃:嘩!應該就唔會喇!佢可能係去整車,我要換車都會係自己買囉!

記:你生日馬明同你去食法國菜,咁2月13日佢生日又點慶祝?

黃:好難諗,我哋兩個都要開工,所以未plan邊日同點慶祝,盡量睇吓通告同佢夾唔夾到先囉!

記:今年係唔係你哋第一個情人節呀?

黃:哈哈!呢樣嘢就唔透露喇!其實情人節好少會慶祝,佢生日重要啲,情人節費事同人迫,啲嘢又貴晒,我覺得好無謂,主要都係佢生日為大前提。

記:去完荷蘭歐遊,你哋嘅發展進度都好理想喎!

黃:依家都係一個舒服嘅相處方式啦!係好咗了解多咗,同埋呢排好開心,平平淡淡,生日嗰日冇人跟我哋覺得好舒服,做番平常人,希望以後多啲時間靜靜哋相處啦!

記:有冇見過馬明媽咪?

黃:見過,但唔係正式好似見家長嗰種見。

記:伯母有冇催婚?

黃:完全冇喎!我屋企都冇!因為我仲有幾個家姐未嫁,呢啲順其自然啦!依家講得太遠喇!

記:馬明有番咁上下年紀係時候。

黃:其實男人咩歲數都Ok!好多男人都好遲先結婚。

心穎出生於小康之家,不過她嚮往物質生活,出入以六十幾萬的 Jeep越野四驅車代步,去年更以八百多萬買入啟德新盤天寰做業主,財力十足。

心穎性格向來進取,努力不懈終於成功打進富二代圈子,早前皮草大王王大業生日P,就掹車邊入場仲可以排除萬難擠進王大業臂彎。

心穎的IG除咗放閃、集郵,還有晒周身名牌,次次入手亦都例必放上網,早前大晒7萬元的新款Hermès Birkin Bag及名錶。

来源:新浪网


Like Rojaklah Facebook!不出门也能知天下事~

Like Rojaklah TV Facebook!随时观看Video,给你Happy给你FUN❤

Comments

comments