現年30歲、憑大台劇《城寨英雄》中「花曼」一角上位嘅港姐王君馨，家陣人氣急升，但每日都係繼續喺佢Instagram貼極都係開工相生活照，又幫吓自家首飾品牌賣廣告，多年嚟幾乎同緋聞絕緣，好似好dry咁。

實情係一啲都唔dry，因為王君馨早已名花有主，身為大台「處女黨」之一嘅佢，背後有個「神秘男友」，但對於男友嘅資料，實在有限——有傳佢男友叫Daniel，係名教徒，長居於美國，任職銀行banker，王君馨同Daniel喺2013年曾經被傳媒拍到過去台灣旅行。

王君馨曾經公開講過，同男友係長期異地戀，平日靠FaceTime聯絡，維繫感情，有時間就會互飛去探對方，但兩個人各有各忙，其實都冇乜點見，而佢男友亦好少被影到，感覺似「虛擬男友」……

不過，原來Daniel早前嚟咗香港，《蘋果》仲影到佢跟女友王君馨出席飯局。當晚大約7點半左右，王君馨、Daniel，仲有「天下第一關」鄭紹康現身中環元創坊（PMQ），當時鄭紹康攞張咭片出嚟交畀Daniel，佢哋雙方都好客氣咁鞠晒躬，王君馨就企喺側邊有講有笑，之後有另一名男士陪王君馨同Daniel走，臨走王君馨仲摸咗鄭紹康手臂同腰幾下先行，Daniel見女友未到，都有擰轉頭望吓。

由於現場係落斜，着住高踭鞋嘅即刻變成小鳥依人，蹺住Daniel手臂慢慢行。之後佢哋3個人行咗去附近一個咪錶位，同行友人上車坐司機位，Daniel就幫王君馨開車門，之後佢先坐上去司機隔籬個位，然後直駛到銅鑼灣日本料理友和。

王君馨同Daniel入去食咗3個鐘飯、約11點離開餐廳，佢哋出咗門口一路同朋友講拜拜，一向都鍾意照顧朋友嘅王君馨仲好好招呼，安排埋朋友坐車，最後先到佢自己同男友上車離開。

雖然王君馨同Daniel愛得低調，但佢早前暗示過Daniel已經求咗婚，有傳男方更加為咗王君馨會喺香港搵工置家o添！唔知今次Daniel嚟香港，有冇傾埋婚事咁呢？

Like Rojaklah Facebook！不出门也能知天下事～～❤

来源：苹果日报