◤『索腿天后』荣升『索妈』◢ Baby初生写真超可爱! 陈敏之说被自己BB冧到晕, 坐完月子就会回去拍戏了～

▲陳敏之話呢十幾日已經畀仔仔冧到暈咗。

【on.cc東網專訊】「索腿天后」陳敏之於上年冬至誕下七磅多的囝囝後，BB手長腳長，腳板大大，似足媽媽。敏之現時忙於照顧愛兒，現時BB十多日人仔，早幾日敏之請了攝影師返家為BB及她拍攝一輯寫真照，相片中敏之與BB頭貼頭，亦有用雙手捧住他的溫馨照片。

「畀個仔冧暈咗」

敏之接受東網獨家訪問時謂：「做咗十幾日媽咪感覺好幸福，自己有埋身餵人奶，親子感覺好sweet，自己冧到爆，依家冧嘅程度係好嚴重、好大件事，我直頭畀個仔冧暈咗，我嘅世界入面只得佢。」

職責做奶媽

▲敏之話仲未敢幫囝囝沖涼，呢家佢職責係餵奶。

問她湊仔時有否雞手鴨腳？她笑言：「其實呢十日裏面喺屋企都有啲打仗feel，但好多人幫我手，比我想像中冇咁辛苦，佢身體太軟，好驚整親佢，我未敢同佢沖涼，頭一個月都想畀陪月姐姐沖，但有從旁睇住、學吓，我依家嘅職責係「奶媽」餵奶，我都要休養、進補吓！」提到BB有一張高難度的翹手、翹腳照片，敏之謂：「呢個籃係我專登揀，好似耶穌喺馬槽出世嘅感覺，自己好鍾意，合十係祈禱，自己好滿意呢輯相，好真情流露。」

坐完月就復工

此外，冬至出世的BB被改花名「雷冬至」，問敏之替BB正式改名未？她坦言：「未，等爸爸改，依家有好多花名。」敏之亦於微博貼上生BB前後的照片，她又留言謂：「感謝天父賜給我們一個可愛的小生命，他的出現，帶給我們一家無限的喜樂！更讓我學會怎樣去當一個好媽媽！」敏之坦言2017年的願望是囝囝身體健康、快高長大，有個開心快樂的童年，而她自己則坐完月後便復工開劇。