49歲葛民輝(阿葛)同老婆區祖凝(Mini)結婚23年,囝囝Jabez今年都21歲。早幾年,人夫就試過俾人傳同麥當勞高層黎韋詩有景轟。早排又傳佢幫拍過《喜愛夜蒲3》嘅梁晶晶(Bonnie)影全裸寫真嗰陣,貼身照顧。搞到老婆要做跟得夫人,睇實老公有冇作反。不過同老婆老夫老妻嘅阿葛,對以上緋聞全部冷對待,總之就行動最實際。

日前中午,趁住喺英國讀書嘅Jabez放暑假返港,阿葛就同老婆囝囝齊齊去筲箕灣安利食河粉。一家三口仲專登襯埋親子裝,着住老竇自家品牌嘅T恤出街。而讀緊大學嘅Jabez,幾乎高過老竇囉,仲要係個超級超級靚仔!

葛氏一家喺麵店食嘢嗰陣,店內職員就輪住同佢哋打招呼,一睇就知係熟客仔,而心情靚靚嘅阿葛同葛嫂,就邊食邊傾邊笑。食完之後,葛仔就嗱嗱聲拎咗張單走去櫃枱俾錢,之後就揸住Benz同媽咪走先,至於阿葛就另外坐架七人車。

臨走時,阿葛就對兩母子做咗電聯同ok手勢,照咁睇,話阿葛同老婆感情麻麻,似乎都係煲水多!相信阿葛都係返去設計公司繼續開工喇。其實阿葛一向都好努力工作,因為佢係家庭經濟支柱又念兄妹情,搵一份錢要幾個人使。可見阿葛嘻皮笑臉背後都係一個顧家嘅真漢子嚟㗎!

 

 

 

来源:苹果日报

Comments

comments