今年11月即將71歲的邵音音,一直被人笑佢因為整容失敗搞到近乎毀容,日前音音姐上ViuTV節目《晚吹—真PK》做嘉賓,自爆當年入行經過、點樣俾人呃去拍三級片,仲親自拆解毀容之謎,原來都好陰功㗎!

整過一次容

音音姐成日俾人笑整容失敗,仲話佢眼耳口鼻都整過,其實音音姐強調咁多年來只整過一次下巴!當時貪靚想塊面睇落尖啲,於是叫醫生幫佢打針,後來音音姐驚有副作用而做移除手術,點知手術失敗,反而令下巴生滿肉芽,明顯變晒形!

 

仆爛半邊面

導致音音姐毀容的真正原因,係廿年前晌屋企仆親所致。音音姐話當時踢到拖把跌倒,成塊面撞落枱角,因為太痛,所以音音姐唔覺意一手撕甩半邊面皮,連骨都見到!去到醫院,護士話大把人緊急過佢,最後等咗5、6個鐘先見到醫生!醫生話等得太耐,令好多空氣入咗去,入面完全腫晒,近乎毀容!

 

李小龍帶入行

本身行船的音音姐,因為一次機會參觀嘉禾電影廠,被功夫巨星李小龍睇中,主動邀請佢試鏡拍戲。音音姐話當時船上冇機會睇到電影,所以完全唔識李小龍係乜水!最抵死係,音音姐話如果早知佢咁出名,就一早溝佢添!不過好不幸,李小龍冇幾耐之後就突然過世,音音姐亦因此被冷落,最後更遇到賤男導演,呃佢拍三級片!

Comments

comments