【终于恨到啦！】里安纳度『奥斯卡』首度封帝！！一起回顾Leonardo角逐奥斯卡影帝之路～
by |
一年一度的電影界盛事，第88屆奧斯卡金像獎頒獎典禮將於今個星期日(2月28日)舉行，雖然20個演員獎項的候選人全是白人，惹來不少批評，不過都無損頒獎禮的可觀性，尤其係今屆的焦點再次落在里安納度狄卡比奧(Leonardo DiCaprio)身上！
大家都明白奧斯卡評審的準則非一般普羅大眾所能理解，好多時大受歡迎的商業大片佢哋都唔會放在眼內，所以里安納度雖然拍過無數經典作品，亦曾五度獲提名角逐奧斯卡，但最後都是鎩羽而歸。
說真的，如今的里安納度已經不復當年的俊俏，不過起碼都係一個型佬，但佢似乎不甘成為一個空有外貌的花瓶，所以近年演的角色都極具挑戰性，賣演技不賣樣。去到今年終於憑《復仇勇者》在多個頒獎禮如金球獎、演員工會獎上封帝，以大熱姿態劍指奧斯卡！等咗咁多年，小編都忍唔住要大叫︰「Give this man an Oscar!」
里安納度今次有分加一
唔講你唔知，原來過去87位奧斯卡影帝當中，有26人都係憑演真實人物角色奪獎，單係近年已經有《霍金︰愛的方程式》、《續命梟雄》、《林肯》及《皇上無話兒》等。今次里安納度在《復仇勇者》中飾演的獵人Hugh Glass亦係真有其人，唔知會唔會得到奧斯卡評審的青睞？
里安納度今次有分加二
唔講你唔知之二，根據過往得獎的角色，「父親」的身份會令角色大大加分，今次里安納度飾演的Hugh Glass在一次任務中被黑熊襲擊，身受重傷，但其同伴不單將佢活埋，更將其兒子殺害！為報殺子之仇，佢咬緊牙關、歷盡艱辛在冰天雪地求存，相信呢份父子情可以令評審加佢分！
里安納度今次有分加三
唔講你唔知之三，可能奧斯卡評審覺得演技同做人一樣，都係需要時間磨練，所以過往奧斯卡影帝的平均年齡為44歲，能夠在30歲前封帝的只有兩人，其中一人係2002年《鋼琴戰曲》的艾哲倫保迪(當時29歲)。如今里安納度都四十有一，唔知評審覺得佢夠經驗未呢？
里安納度今次有分加四
唔講你唔知之四，奧斯卡評審當中近八成為平均63歲的年長男士，有說法指佢哋一向唔鍾意年輕又英俊的男演員，畢彼特、湯告魯斯等男神都未攞過獎。如今里安納度冇前咁靚仔，在片中披頭散髮又狼狽，能唔能夠令評審改觀呢？
其實里安納度過往演繹過很多經典角色，演技可算爐火純青，能否首奪小金人，大家好快會知道，在這之前《新地網》為大家列出八個里安納度經典角色，雖然未能成功衝擊奧斯卡，但絕對值得收藏一睇再睇！
《鐵達尼號》(Titanic)
由占士金馬倫執導、世上無人不曉的經典電影《鐵達尼號》，無論電視重播幾多次都一樣咁多人睇。當年只有23歲的里安納度青靚白淨，英俊帶點稚氣，再加一雙電死人無命賠的藍眼睛，完全就係一個現代的白馬王子！
里安納度在片中飾演Jack Dawson，一個只有20歲的窮小子，與富家女主角Rose發展出一段浪漫淒美的愛情故事。Jack看似玩世不恭，但卻是情深一片，在電影末段更為愛情壯烈犧牲，時至今日依然有無數人睇到喊濕幾個枕頭。無論係「You jump I jump」、「I’m the king of the world」定係為琦溫絲莉畫裸體素描，都已經深深烙印在世人腦海，里安納度亦從此擠身國際巨星行列。
《羅密歐與茱麗葉之後現代激情篇》(William Shakespeare’s Romeo + Juliet)
莎士比亞《羅密歐與茱麗葉》呢個經典愛情故事無人不曉，呢部1996年的電影就將故事由古代改成現代，貴族世家改為意大利黑手黨，角色決鬥當然也由刀劍變成槍械。不過人物關係，以及重要對白等都忠於原著，玩命十足，上映時大受歡迎。
里安納度拍呢部電影時比《鐵達尼號》更年輕，帥氣得驚人。羅密歐與茱麗葉多年來作為年青戀人的典型，由里安納度飾演九十年代的羅密歐就最適合不過。佢完全表現出青少年的青澀、反叛不羈的神情，仲有對愛情的義無反顧，絕對是佢演藝生涯初期的代表作之一。
《華爾街狼人》(The Wolf of Wall Street)
名導馬田史高西斯執導作品，故事由真人真事改編，改編自股票經紀人Jordan Belfort在獄中寫成的傳記。Jordan Belfort係一位極具爭議性的傳奇人物，佢二十幾歲就靠投資成為千萬富翁，曾試過三分鐘內賺到1,200萬美元，獲得「華爾街狼人」(The Wolf of Wall Street)的稱號。
里安納度將呢位奇人演繹得淋漓盡致，無論係初到華爾街時的天真無邪，定係後來變為一個沉淪酒色同毒品的癲佬，都演得入木三分。其中一幕震撼人心的演說更睇到觀眾起晒雞皮，可算係里安納度近年最瘋狂的角色。
里安納度亦順理成章憑此片角逐第86屆奧斯卡最佳男主角，不過最終不敵《續命梟雄》的馬修麥康納希。
《黑殺令》(Django Unchained)
鬼才導演昆頓塔倫天奴作品，里安納度喺呢套戲只係配角，而且下半部先登場，不過都足以令人留下深刻印象！佢飾演一個勁有錢但變態、名叫Calvin的富二代，專門販賣黑奴，仲捉咗主角Django的老婆做僕人。另外佢又喜歡睇黑人格鬥至死，完全唔當黑人係人。
里安納度從影多年都係做主角，不過今次做配角之餘仲犧牲佢一貫的瀟灑形象，去演一個變態佬，令觀眾感受到里安納度的另一面，出色表現亦令佢獲提名金球獎最佳男配角。
《不赦島》(Shutter Island)
同樣係馬田史高西斯之作，今次里安納度飾演一個聯邦警官，同下屬麥克雷法路(即係變形俠醫)去到不赦島上調查一宗病人失蹤案。不過過程中困難重重，佢既要面對島上各懷鬼胎的人們，以致終日疑神疑鬼；同時又被過去的恐怖夢魘纏繞，在回憶﹑現實以及幻覺之中遊走，分裂出兩種人格，表現出極其複雜的內心世界。
整部電影不停在及現實及幻想之間穿插，甚至有唔少觀眾一睇再睇後都未明白結局的真相，電影能夠成功營造出恐布懸疑的氣氛，里安納度精湛的演技功不可沒。
《捉智雙雄》(Catch Me If You Can)
同樣係真人真事改編，里安納度飾演史上最年輕的欺詐犯、年僅16歲的Frank，佢利用天賦的才能展開傳奇的犯罪之旅。在兩年間佢化身為機師、醫生或是大學教授等多個不同身份，透過偽造支票和多種方式騙取近400萬美元，詐騙地點多達26個國家，被捕時不過是18歲。
里安納度的俊臉令佢扮演十多歲的年輕人也不突兀，佢具備那種年輕人的意氣風發，亦能表現出角色的機智聰明。Frank雖是一個罪犯，但畢竟係一個壞中有好、心地善良的小伙子，令人又愛又恨。雖然在片中做盡壞事，不過你望見佢迷人的笑容後又嬲佢唔落，先係至高境界！
《娛樂大亨》(The Aviator)
又又又係由真人真事改編的故事，同時亦係馬田史高西斯之作，可見里安納度扮演真實人物確有一手。里安納度係整部片的靈魂，飾演航空業鉅子Howard Hughes，將呢位人物傳奇的半生呈現大銀幕。
Howard係一位追夢者，熱愛挑戰自我，喺唔同行業都有重大貢獻。風流倜儻的里安納度將呢位集航空業鉅子、荷李活大製片家、賭城大亨，英勇飛行員以及花花公子於一身的傳奇人物演得淋漓盡致。雖然Howard表面上的個人事業成功輝煌，但背後卻是活在極大的不安之中，且不時強迫症及妄想症發作，電影中表現出兩種截然不同的人格，而里安納度將兩者都拿挰得剛好。
里安納度演飾真實人物似乎特別出色，憑此片獲第77屆奧斯卡最佳男主角提名，結果就…唔需要多講，大家都知。
《血鑽》(Blood Diamond)
《血鑽》上映時惹來不少爭議，電影揭發鑽石業背後牽涉到的內戰、軍火交易和公平正義等問題，探討來自戰亂地區，以當地人民鮮血換來的鑽石。里安納度飾演Danny，一個在非洲土生土長的白種人，本來沒甚良心、一切都是以利益出發的走私販；但後來卻屢次展現出人性的光輝，使角色有血有肉。
里安納度成功詮釋出一個無名小卒在大時代中的無力和無奈，佢唔係沒有良心，只係太懂得生存技巧，明白要生存就唔能夠大仁慈。在電影末段，受傷流血不止的Danny將巨鑽送給男配角父子，並在電話中對女主角的深情告白更是賺人熱淚。里安納度跟片中男配角一同獲提名第79屆奧斯卡最佳男主角及男配角，但最終還是不敵當年全球激讚、《最後的蘇格蘭王》的科力士韋德加。
全文完