無綫台慶劇《張保仔》正在熱播中，雖然有斥資三千萬嘅CG特效，又有陳展鵬同陳凱琳等大卡士，不過接連派膠以致評價麻麻。劇集中就有黃娣妹穿越時空，仲同張保仔以及旻皓譜出一段三角關係。而其實根據歷史，張保仔都的確陷入過一段三角戀…不過同嗰兩位虛構人物無關，而係佢同義父鄭一以及義母鄭一嫂！同性戀、同義父義母嘅不倫戀呢啲情節，TVB就當然拍唔出，未俾人投訴過咩！不過《新地網》依家就為大家解構呢段史實，順便講吓真實人物同劇中角色有咩唔同！

劇中羅樂林飾演嘅鄭一，同歷史上嘅真實人物同名。鄭一，名文顯，係海盜首領鄭連昌嘅長子，故取名「一」。佢哋由祖先起多代都係海盜，係名副其實嘅海盜世家。鄭一所領導嘅紅旗幫係聯盟中勢力最強大，而且佢高瞻遠矚，促成了廣東海盜的聯盟。

佢會將俘虜嘅漁民收為部下，其中張保仔就係出海捕魚嘅時候被鄭一捉走。不過史實嘅鄭一就唔似得羅樂林咁一心愛錫張保仔，原來佢係一名雙性戀者，有老婆嘅同時又貪戀年輕俊俏嘅張保仔，咁張保仔喺唔知自願還是威迫之下同義父發展一段同性戀…所以話張保仔上位快除咗因為佢本身嘅才幹，仲要靠呢段超友誼關係…

另外，歷史上鄭一死時只係約42歲，所以同羅樂林(今年66歲)嘅形象其實有段距離。咦咁即係羅樂林又要死？不過今次都唔會一日死5次嘅，都冇咁慘…

劇中邵美琪飾演嘅石嬌係鄭一嘅老婆，相信就係「鄭一嫂」石香姑，係歷史上最出名嘅女海盜之一。

鄭一嫂原名石陽，乳名香姑，本來係一名蜑戶妓女，後來嫁俾海盜頭目鄭一，於是後世一般只會稱佢為「鄭一嫂」。石氏雖然係青樓女子出身，不過聰明機智而且獨具慧眼，嫁俾當時只係小頭目嘅鄭一，從此踏上海盜人生。

除咗出謀獻策，本身亦武藝不凡，各幫海盜都尊稱佢為「龍嫂」。雖然已經有老公鄭一，不過鄭一嫂都係同美少年張保仔互生情愫。其後鄭一遇上颱風葬身大海，黑、白、黃、藍等各旗海盜都想乘虛而入，不過喺張保仔嘅輔助下，鄭一嫂能有效統領群雄，而張保仔亦都可以光明正大咁勾義嫂(定俾義嫂勾？)。

藉着同鄭一嫂嘅關係，張保仔嘅地位亦不斷提高，二人合力將紅旗幫嘅勢力推至最高峰，多次擊退清海軍以及英國戰艦，威震海外。

邵美琪比洪永城年長，所以劇集嘅選角都尚算切合，不過兩人喺劇中就規規矩矩，張保仔都只係會尊稱佢為「嬌姐」。而鄭一同石嬌亦都相當恩愛，睇嚟就唔會有張保仔介入啦！

大家都知道張保仔嘅紅旗幫最後接受咗清廷招安，原來鄭一嫂係促成事件嘅關鍵人物！

經歷赤瀝角海戰後，紅旗幫元氣大傷，權衡利弊後本來已有意投誠。不過雙方第一次談判破裂，處於劍拔弩張之勢。結果藝高人膽大的鄭一嫂打破僵局，佢毅然率領一個包括佢在內只有18名婦女同小孩嘅「談判團」，直闖廣州嘅兩廣總督衙門同百齡談判。要知道當時大清律例，被捕嘅盜賊首領可是要凌遲處死！

大家亦唔好以為鄭一嫂會係苦苦哀求，佢係警告百齡如果唔答允，紅旗幫將會同清政府抗戰到底，大不了一拍兩散！最後百齡接受所有鄭一嫂提出的條件，張保仔獲封三品官，而且可以保留一支約有三十艘船嘅私人船隊，多年來搶劫回來嘅財產都唔再追究；而鄭一嫂則被冊封為「誥命夫人」，真係威到盡！

呢場談判仲有一段小插曲，話說接受招安嘅鄭一嫂同張保仔係必須下跪以表敬意，二人當然不甘。於是百齡擔任佢哋嘅證婚人 ，咁就名正言順向證婚人下跪，亦都名正言順成為夫妻。

鄭一嫂喺歷史上赫赫有名，除咗華人電影會提及，外國電影都一樣有！

喺荷李活賣座電影《加勒比海盜︰魔盜王終極之戰》入面，九大海盜之中有一位貌似中國人嘅女性，叫做「Mistress Ching」 ，據說就係以鄭一嫂為原型創作出嚟嘅人物。而呢個角色就係參考自阿根廷作家Jorge Luis Borges一本短篇小說《The Widow Ching-Pirate》，入面嗰位姓秦嘅寡婦其實就係鄭一嫂，至於點解係姓秦唔係姓鄭相信只係外國人翻譯上嘅問題。

咁比起上來Maggie演嘅鄭一嫂靚好多喎！

来源：东方新地